No último día das Festas da Peregrina, cando a redución de prezos con motivo do día do neno fai que a afluencia de público da arrancada de despedida, un feirante que xestiona unha das atraccións instaladas en Raíña Victoria, sinalaba: "Este ano foi un 30% máis frouxa esta feira".
O resultado destes once días repetíase en todas as atraccións consultadas, tanto as que atraen ao público de menos idade como as destinadas a mozas e adultos. "Moi mal, non houbo xente", "moitísimo menos que anos anteriores", "moi frouxiña, viña xente, pero non gasta", "frouxa", "mellor non che conto", "frouxo, moi frouxo, non houbo a afluencia doutros anos", "moi frouxo", " este ano foi moi frouxiño", "mira canta xente hai e a viaxe está hoxe a dous euros"...
Se o tempo non foi un elemento en contra e se a cidade excedeu de persoas, o que fallou tamén o sinalan estes feirantes: "non hai cartos. Se a xente non pode gastar, non van vir á feira cos nenos para non subilos ás atraccións, así que xa non veñen. Como moito, aproveitan hoxe".
"Como isto siga así..., quitounos xente o cambio das tiradas dos fogos de lucería, os concertos non nos traen, os touros foron só unha fin de semana e o Concello non nos rebaixa o prezo por instalarnos... como non funcione Lugo, que é a grande que nos queda...", lamentábase outra das feirantes habituais.