Arredor de 1.500 persoas acudiron este domingo a Monte Castrove no acto organizado polo Partido Popular con motivo do cumprimento do primeiro ano de mandato dos populares no goberno local de Poio, con Ángel Moldes asumindo a alcaldía.
A XVII edición desta tradicional Romaría Popular contou coa presenza de Luis López, presidente provincial do PP e da Deputación de Pontevedra; ademais de Paula Prado, secretaria xeral do PPdeG.
Moldes afirmou durante o acto que son un goberno "para toda a veciñanza, con diálogo, porque ninguén mellor que todos vós sabedes cales son as necesidades e prioridades do noso concello", explicou o rexedor.
Agradeceu tamén o traballo realizado por cada concelleiro do seu equipo de goberno para asegurar que se trata dun goberno "comprometido, responsable e eficiente".