O goberno local de Poio presentou durante a tarde deste xoves nun encontro cos residentes un programa de actuacións para o núcleo da Caeira e a zona de Boavista que suma un orzamento total de 3,4 millóns de euros.
O alcalde, Ángel Moldes, detallou nunha reunión mantida nas instalacións do Liceo Casino os proxectos destinados a intervir na rede de servizos, a seguridade viaria e a accesibilidade deste ámbito do municipio.
Unha das partidas principais, de aproximadamente 800.000 euros, destinarase á contorna das rúas Río Sil, Río Umia e Río Oitavén.
Esta intervención recolle a reurbanización completa dos viais, a renovación do firme e a creación dunha plataforma única para suprimir as barreiras arquitectónicas.
O proxecto técnico contempla o soterramento das canalizacións, a instalación de novos sistemas de drenaxe e a actualización do alumeado público.
Prevese a apertura dunha nova conexión peonil que unirá as rúas Río Sil e Río Tambre mediante a adecuación dunha corredoira con escaleiras.
En canto ás áreas de lecer, o plan inclúe a rehabilitación dunha zona deportiva e infantil que contará cun campo multideportivo, bancadas e xogos.
O groso do investimento, valorado en 2,5 millóns de euros, céntrase na mellora dos servizos de saneamento, abastecemento e pluviais en San Antoniño, Río Miño, Illa de Ons e Illa de Tambo.
Estas obras están vinculadas ao contrato da auga subscrito polo Concello en febreiro de 2025. Segundo o cronograma establecido, os traballos deberán executarse dentro dos dous primeiros anos de vixencia da devandita concesión.
Por outra banda, en Illa de San Simón xa se procedeu á mellora das redes a través dun convenio con Zoe Home e o Club de Tenis.
Esta medida permitiu trasladar as tubaxes que discorrían por propiedades privadas cara ao espazo público, instalando novos pozos de bombeo e separando as redes de saneamento e pluviais para facilitar o seu mantemento.
O plan municipal tamén recolle solucións puntuais de tráfico, como a reordenación do estacionamento na rúa Illa de Ons coa intención de despexar os accesos e mellorar a visibilidade na entrada e saída dos garaxes privados.
Respecto ao estado do pavimento, o Concello informou de que a reposición do firme nas rúas da Caeira e Boavista se levará a cabo unha vez rematen as obras que a Xunta de Galicia executa na estrada PO-308.
Na actualidade, o tráfico está a ser desviado por estas zonas debido aos traballos na vía principal. Segundo o rexedor, a situación de tráfico derivada destes desvíos indica a falta de viabilidade do sentido único que estudaba o goberno bipartito.
Precisamente, a oposición critica a Moldes por terse "apropiado" dos plans para toda a contorna da Caeira.
Engade Pontevedra Viva como fonte preferida de Google de balde
Mantente informado coas últimas noticias de actualidade.