Coa chegada do bo tempo e o incremento das horas de luz, o Concello de Barro impulsa unha estratexia de control da avespa velutina centrada na prevención.
O obxectivo prioritario desta iniciativa é a captura de raíñas nas semanas previas e iniciais da primavera, un período crítico no que os exemplares son máis vulnerables antes de que se refuxien definitivamente no interior dos niños para iniciar o seu ciclo reprodutivo.
Dende a administración local incídese en que cada captura realizada nestas datas supón a eliminación potencial dun futuro asentamento.
Esta acción reduce os riscos de ataques para as persoas e mitiga o impacto negativo que esta especie invasora exerce sobre o ecosistema e a fauna autóctona.
Para que o trampeo sexa efectivo e respectuoso co medio ambiente, as recomendacións técnicas sinalan a importancia da selectividade.
Os dispositivos deben contar con orificios de entrada axustados ao tamaño da velutina para impedir o acceso de especies maiores, así como pequenas saídas ao nivel do líquido que permitan escapar a outros insectos beneficiosos de menor envergadura.
Os puntos idóneos para situar estas trampas son as árbores en floración, como as camelias, os escobilleiros ou as froiteiras, procurando sempre que reciban luz solar directa para favorecer a vaporización do cebo e aumentar o seu poder de atracción.
Respecto á elaboración do produto de atracción, o Concello propón unha fórmula económica e funcional composta por 250 ml de auga, 200 g de azucre e un pouco de lévedo, unha mestura que require ser renovada cada dez ou quince días para manter a súa operatividade.
Engade Pontevedra Viva como fonte preferida de Google de balde
Mantente informado coas últimas noticias de actualidade.