O barrio de Monte Porreiro será a zona prioritaria na que, segundo o alcalde de Pontevedra, Miguel Anxo Fernández Lores, poderanse investir os 3 millóns de euros que a Xunta de Galicia concedeu ao Concello de Pontevedra para financiar as actuacións que este decida.
"É unha boa noticia para Pontevedra que existan acordos e principios de acordo", afirmou Fernández Lores, sobre unha reunión que non se fixo pública no seu día porque "era un tanteo" para ver en que proxectos podían colaborar as dúas administracións.
Tras destacar que está "contento" polo pacto alcanzado, o alcalde avanzou que o goberno municipal "traballará" nas actuacións que, en materia de deportes e saneamento, se poderán executar cos 3 millóns de euros comprometidos pola Xunta.
Asegurou que "temos que ver o que lle interesa máis á cidadanía", porque defendeu que "pode haber cousas interesantes pero que sexan de díficil tramitación ou outras que non sexan facilmente executables" nos prazos de tempo que se determinaron.
"En principio estamos a pensar en Monte Porreiro", sinalou o rexedor pontevedrés, aínda que aclarou que "podemos ter outras alternativas que tamén hai por aí".
Entre as actuacións que se barallan estarían melloras nas rúas de Monte Porreiro, onde os servizos "teñen moitos anos e están mal", renovando as conexións dos edificios coa rede de saneamento, ou no novo pavillón especializado en tenis de mesa.
Na reunión entre Alfonso Rueda e Miguel Anxo Fernández, segundo desvelou o alcalde, "tamén falamos de máis cousas", entre elas a ampliación do polígono do Campiño ou a unidade de atención a drogodependentes, que a Xunta asumirá "en canto se poida".
Ademais, os dous dirixentes abordaron a "liberación" das parcelas que a Xunta ten na Xunqueira de Alba. Unha delas, a de infraestruturas, trasladarase ao polígono de Barro. A outra, onde se arranxan vehículos, "non queren que saia de Pontevedra", afirmou Lores.
O acordo inicial era que esta segunda nave marchara para Lalín pero, segundo o alcalde, "hai problemas para que se vaia para alá", polo que o goberno galego pediulle ao Concello unha parcela para o traslado desas dependencias.
"Nós temos posibilidades de ceder algunha parcela", sostivo Fernández Lores, que pediu á Xunta que remita as necesidades de tamaño e edificabilidade que necesitan "para que eles poidan construír unha nave fóra da Xunqueira de Alba".
Como contrapartida, o executivo municipal asumirá a titularidade de varios tramos de estradas autonómicas, concretamente os que van da entrada ao porto de Marín até Estribela ou a estrada a Campo Lameiro, desde Médico Ballina e o viario inferior cara a Montecelo.
O alcalde, en todo caso, celebrou que "nos últimos tempos" produciuse un "cambio para ben" nas relacións entre a Xunta e o Concello, despois dun longo período no que, segundo lembrou, "se atrancaron moitos proxectos" importantes para a cidade.