Xa están en marcha as obras para a recuperación de espazos e a humanización do lugar de Mos, emprazado nas inmediacións do casco urbano de Santa Lucía, e da capela da Concepción.
Estes traballos, que teñen un investimento de 514.000 euros, serán financiados entre a Xunta de Galicia e o Concello de Moraña.
As obras durarán un período de seis meses polo coidado que se debe empregar en certos treitos e actuacións e porque contemplan a renovación de servizos.
Todo o vial da rúa Mos pasará a ter plataforma única de circulación con prioridade peonil.
A actuación incluirá a renovación do seu firme, a instalación de medidas de calmado de tráfico, o aproveitamento dos sobreanchos sen urbanizar existentes ou a modernización dos servizos de saneamento -con separación de augas pluviais e fecais-
Ademais, renovarase o alumeado, que terá novos sistemas de eficiencia enerxética, e toda a zona terá novo mobiliario urbano, bancos, papeleiras e xardineiras.
O alcalde de Moraña, Sito Gómez, destacou que este proxecto busca converter unha zona "con pouco atractivo" para os peóns nun barrio "bonito e confortable" que sirva como punto de encontro para os veciños e "siga mellorando a estética do noso casco urbano".
Por outra banda, esta actuación tamén contempla a mellora do acceso á capela da Concepción.
Será cunha senda que terá un primeiro treito adoquinado, duns 150 metros, seguindo as directrices de Patrimonio e un posterior ata alcanzar os 260 metros con saburra e bordo, o que favorecerá a chegada ao templo.
Ademais, a obra inclúe o acondicionamento dun espazo verde e arborado na zona e as conexións do vial de Mos e da capela con traballos previos realizados nas rúas N-6, N-2 e N-1.
Gómez celebra que con esta obra "imos pechando a nosa trama urbana do casco de Santa Lucía", xa que pola parte traseira da zona chégase ata a explanada do edificio multiusos.