Sanxenxo volve situarse á cabeza dos municipios españois en calidade e excelencia turística ao obter este ano 18 bandeiras azuis para as súas praias, unha máis que na pasada edición. O concelleiro de Turismo e Praias, Juan Deza, recolleu os galardóns en Xove, na Mariña lucense, consolidando ao municipio como referente nacional na xestión do seu litoral.
A principal novidade deste ano é a incorporación da praia de Pampaído á listaxe de areais distinguidos. Tras rexistrar durante os últimos tres anos unha calidade da auga excelente, este enclave contará ademais con todos os servizos necesarios para os usuarios, incluídos socorristas e un módulo de aseos cuxa limpeza se realizará cada 90 minutos, seguindo o modelo implantado polo Concello desde a pandemia.
Con esta nova incorporación, Sanxenxo alcanza as 30 distincións concedidas pola Asociación de Educación Ambiental e do Consumidor (ADEAC). Ás 18 bandeiras azuis de praias súmanse nove sendeiros recoñecidos (seis costeiros e tres de interior) e tres distintivos vinculados a instalacións náuticas.
Entre os sendeiros destaca este ano a incorporación do percorrido O Con da Ventureira–Con da Romaiña, que conecta as parroquias de Padriñán e Nantes, ampliando a oferta de espazos naturais certificados do municipio.
Ademais, manteñen a bandeira azul os clubs náuticos de Sanxenxo e Portonovo, así como o porto deportivo de Nauta. A única ausencia temporal é a da Telleira, que perde a distinción debido ás obras de transformación do espazo nun centro de interpretación do litoral da ría de Arousa. No entanto, o goberno local confía en recuperar o recoñecemento unha vez finalizados os traballos.
"En 2027 poderiamos conseguir unha bandeira azul máis, pero o noso obxectivo non é tanto seguir aumentando as distincións como mellorar os servizos onde xa contamos co distintivo azul", sinalou Juan Deza.
O novo recoñecemento a Pampaído chega nun contexto especialmente favorable para Galicia, que alcanza este ano 118 praias galardoadas en 38 municipios.
Ademais de Sanxenxo, entre as catro praias que estrean bandeira azul na comunidade figura a do Laño, en Poio, ademais das de Niñóns (Ponteceso) e Os Franceses (A Veiga), esta última convertida na primeira praia fluvial da provincia de Ourense en obter este distintivo.
"Ter un litoral magnífico, o máis longo de España, pero tamén cos mellores estándares de calidade, significa que a vida económica, as persoas e as actividades que existiron toda a vida poidan seguir estando aí, sendo rigorosos e respectuosos. E o mellor xeito de expresar todo iso son estas bandeiras azuis", asegurou o presidente da Xunta, Alfonso Rueda
Rueda felicitou así aos municipios galardoados e agradeceu o traballo da Asociación de Educación Ambiental e do Consumidor (ADEAC) por impulsar á comunidade para superarse ano tras ano, á vez que avogou por seguir mantendo esa esixencia que "nos beneficia a todos".
Dentro do panorama galego, Pontevedra continúa liderando a clasificación provincial con 56 bandeiras azuis en praias e seis en instalacións portuarias.
