Nove serán este ano as rutas que luzan con orgullo en Sanxenxo o distintivo de Sendeiro Azul.
Son un máis que en 2025 grazas á incorporación da Ruta do Con da Romaíña - Con da Ventureira.
As bandeiras que acreditan a calidade dos carreiros xa están en mans do Concello, que se desprazou até Valencia para poder recibir a distinción.
"O noso obxectivo é seguir recuperando os espazos naturais para desfrute de veciños e visitantes tanto no litoral como no interior", asegura o concelleiro de Turismo e Praias, Juan Deza.
O programa Sendeiros Azuis da Adeac recibiu este ano preto de 200 candidaturas, de 150 municipios diferentes.
O galardón destaca a recuperación e posta en valor de carreiros e camiños que promoven a educación ambiental e o goce sostible da contorna.
No caso de Sanxenxo forman parte da exclusiva lista de Sendeiros Azuis: Ruta dos Carballos de Aldariz, Senda Fluvial do Río Pintillón, Sendeiro Litoral Areas-Punta Festiñanzo, Sendeiro Litoral Canelas-Punta Cabicastro, Sendeiro Litoral Montalvo-Major, Sendeiro Litoral Paxariñas-Montalvo, Sendeiro Litoral Sanxenxo-Portonovo, Sendeiro Máxico da Lanzada e a Ruta do Con da Romaíña-Con da Ventureira.