Non cabía un comensal máis. A Carballeira de Santa Lucía volveu converterse este domingo no gran comedor ao aire libre de Galicia con motivo da LVII Festa do Carneiro ao Espeto de Moraña, unha das citas gastronómicas máis emblemáticas do verán, que volveu demostrar o seu enorme tirón ao colgar o cartel de "non hai billetes" ou, neste caso "xa non quedan lotes".
A organización esgotou a totalidade dos lotes postos á venda para unha comida popular que reuniu a preto de 3.200 persoas.
A celebración, declarada Festa de Interese Turístico de Galicia, mantén intacta unha tradición que fixo de Moraña un referente do turismo gastronómico.
Máis de 200 carneiros novos foron preparados durante horas seguindo un ritual que apenas cambiou co paso do tempo. Abertos en canle e suxeitos ás características estruturas metálicas, os animais ásanse lentamente coa calor indirecta das brasas de madeira de carballo mentres os mestres asadores réganos de forma constante co famoso ajilimójilis, unha salsa cuxa receita continúa sendo un dos segredos mellor gardados da festa e que achega á carne a súa inconfundible xugosidade e sabor.
Detrás deste espectáculo culinario hai tamén un importante despregamento humano, cunha trintena de persoas traballando desde primeira hora xunto ao lume para que todo estivese listo á hora do xantar, nunha cita que pasou de cociñar apenas catro carneiros nos seus inicios a converterse nun dos acontecementos gastronómicos máis multitudinarios da provincia de Pontevedra.
A xornada contou ademais cunha ampla representación institucional. Acompañando ao alcalde de Moraña, Sito Gómez, estiveron desde os conselleiros de Educación, Ciencia, Universidades e FP, Román Rodríguez, e de Vivenda e Planificación de Infraestruturas, María Martínez Allegue; o delegado territorial da Xunta en Pontevedra, Pablo Fernández, até o presidente da Deputación de Pontevedra, Luís López.
Todos eles participaron nos actos oficiais celebrados na Casa Consistorial antes de desprazarse até a carballeira para compartir o tradicional xantar.
Coincidiron tamén en destacar o valor dunha celebración que sitúa a Moraña como un dos grandes escaparates do turismo gastronómico das Rías Baixas.
Outro aspecto destacado é que esta combinación de tradición, cultura e gastronomía converte á Festa do Carneiro ao Espeto nunha dos grandes sinais de identidade de Galicia.
A programación festiva non terminou co xantar pois a tarde estivo amenizada pola actuación do grupo The Teta's Van, mentres que a noite porá o broche final ás celebracións cunha gran verbena protagonizada por Panorama City, a orquestra América de Vigo e a animación musical de Euphoria Disc.
Engade Pontevedra Viva como fonte preferida de Google de balde
Mantente informado coas últimas noticias de actualidade.