O Servizo de Emerxencias do Concello de Cambados tivo que mobilizarse durante a tarde do mércores 21 de maio para atender dous accidentes de tráfico ocorridos en diferentes puntos da comarca.
O primeiro incidente rexistrouse na Avenida da Pastora, no municipio de Cambados, ao impactar dous turismos de maneira frontal.
Neste suceso, un home de 35 anos, veciño de Poio, tivo que ser evacuado ao centro sanitario por presentar mareos.
Na intervención participaron tamén efectivos da Policía Local de Cambados e unha ambulancia do 061.
Posteriormente, os servizos de emerxencia acudiron a un segundo sinistro na estrada EP-9305 en Barrantes, Ribadumia, onde unha motocicleta saía da vía.
O piloto, veciño de Ribadumia, resultou ferido e foi trasladado ao Hospital do Salnés pola ambulancia do 061.
O motorista presentaba dor na zona da omoplata, molestias cervicais e rabuñaduras no brazo esquerdo, pés e xeonllos.
Neste segundo caso, ademais da ambulancia, interviron efectivos de Protección Civil de Ribadumia e a Garda Civil de Tráfico, ademais do servizo de Emerxencias de Cambados.