Un mural efémero e comunitario 'descobre' o tramo soterrado do río Valdecorvos

O río Valdecorvos e o seu tramo soterrado son durante esta fin de semana os protagonistas das accións veciñais da zona.

A denominada Mesa pola Recuperación do Río Valdecorvos, composta por AFIRVAL, asociación veciñal Altamira, A Pedreira, Vaipolorio, APDR e ANPA Vilaverde, organizou este sábado e este domingo o evento 'Descubrindo o Río'.

A acción veciñal inclúe dous días de actividades para visibilizar, coñecer e reivindicar o valor ambiental, histórico e urbanístico do río Valdecorvos e denunciar a súa situación de abandono, soterramento e máis de 50 anos de inundacións. 

A fin de semana inaugurouse coa actividade 'Pintar a traza do río' a partir das 11.00 horas do sábado entre a rúa Casimiro Gómez e o Centro Galego de Tecnificación Deportiva (CGTD) en Fernando Olmedo. 

Co tramo soterrado como lenzo, os participantes debuxaron coas cores do río nun mural efémero e comunitario.

Música, comida caseira e ambiente veciñal acompañaron a actividade. Así, a música tradicional con gaitas e baile a cargo da Banda de Gaitas e Danza O Son da Pedra amenizou a tarde. 

Xa este domingo, a partir das 16.00 horas haberá roteiros informativos a cargo de especialistas e veciños e veciñas colaboradores. 

Os organizadores convidan a percorrer a senda do Valdecorvos, recuperada grazas á colaboración veciñal, explicando os principais puntos de interese naturais, sociais e históricos.

Ademais, desde este sábado, e ata o martes 17 de xuño, pode visitar na rúa Pai Fernando Olmedo 54 (ao carón de Patatas Bua) unha exposición histórica.

Máis de 20 láminas en gran formato e a toda cor sobre a historia e transformación do Valdecorvos integran a mostra, que inclúe documentos veciñais e imaxes do pasado, imaxes inéditas da cidade dende o século XVI ata os nosos días, expertos testimoniais e investigación en colaboración coa ETSAC (Escuela Técnica Superior de Arquitectura) e a Universidade da Coruña. 

A programación conta coa colaboración do Concello e a Deputación de Pontevedra e de moitos dos negocios afectados.