A conexión ferroviaria entre Vigo e Santiago de Compostela permaneceu interrompida durante catro horas na noite do xoves e madrugada deste venres.
O motivo da suspensión foi a presenza dun home subido á estrutura dos cables de alta tensión na zona de Trabanca Badiña, situada nas proximidades da estación de Vilagarcía de Arousa.
Ante o risco de electrocución, o Administrador de Infraestruturas Ferroviarias (Adif) procedeu ao corte da subministración eléctrica pasadas las 22:00 horas.
O parón afectou de forma directa a un tren procedente de Vigo con destino á Santiago de Compostela e A Coruña e a outro convoi que cubría a ruta cara a Barcelona.
Os pasaxeiros permaneceron no interior dos vagóns, que quedaron sen luz temporalmente.
A través de comunicacións por WhatsApp, unha usuaria describía a escena: "Estou nun tren parado desde fai máis dunha hora porque un señor subiu a un cable eléctrico que dá tensión aos trens e a policía non o dá baixado".
Durante o tempo que durou a intervención, os viaxeiros solicitaron ao persoal de Renfe a apertura de portas para desprazarse a pé ata a estación, dada a proximidade do núcleo urbano de Vilagarcía. Petición que non foi atendida.
Entre os afectados figuraban varios bebés. A falta de alternativas de transporte xerou críticas entre os pasaxeiros, quen manifestaron nas súas mensaxes que "é de vergoña que non freten buses ou abran portas…. País de pandeireta".
Outros usuarios destacaron a actitude dos presentes: "Bastante tranquila está a xente... pero que falta de xestión".
Ningunha persoa necesitou asistencia médica dentro dos vagóns, excepto un menor con síntomas de fatiga cuxa familia solicitou asistencia a través dunha chamada ao 112 Galicia ás 2.30 horas da madrugada.
Posteriormente, foi atendido por un equipo de Urxencias Sanitarias de Galicia-061.
No lugar dos feitos coordinouse un dispositivo de seguridade e auxilio composto pola Policía Local de Vilagarcía, Policía Nacional, Bombeiros e efectivos de Emerxencias, ademais de sanitarios do 061.
Os equipos de rescate instalaron uns colchóns de seguridade baixo a catenaria como medida de prevención.
Mediante unha acción coordinada cos psicólogos do grupo de intervención psicolóxica en catástrofes e emerxencias do Colexio Profesional de Psicoloxía de Galicia, lograron que a persoa abandonase o lugar e recibise asistencia.
Así, tras máis de tres horas de diálogo, o home descendeu polos seus propios medios e foi trasladado en ambulancia a un centro sanitario.
A circulación ferroviaria quedou restablecida pasadas pasadas as 03.00 horas da madrugada, unha vez que a vía foi despexada.
Foi necesario facer transbordo de viaxeiros a outro tren que chegou a Compostela preto das 04.00 horas, segundo relatan persoas afectadas, que mesmo recoñecen que aplaudiron o revisor por manter a tranquilidade e calmar os pasaxeiros durante esas horas de nerviosismo.
Alén de sanitarios, axentes de Policía Nacional e psicólogos, o 112 Galicia pediu a colaboración dos axentes da Policía Local e do servizo municipal de emerxencias.
Esta incidencia tivo consecuencias na programación deste venres 8, con atrasos nas saídas desde a estación de Vilagarcía durante as primeiras horas da xornada.