A Feira da Peregrina romperá este ano de forma radical coa imaxe que, tradicionalmente, presidía os seus carteis.
Esa era o obxectivo que buscaba a Coordinadora de Peñas Taurinas ao convocar un concurso para elixir o deseño dunha cartelería que, ata agora, estaba presidida por unha pintura que evocaba escenas de toureo e a información dos matadores que ían participar nos festexos.
E visto o resultado, cumpriron co que se propoñían. O coso de San Roque, o porto das Corbaceiras e o santuario da Peregrina son os protagonistas dun animado cartel que deseñou o pontevedrés David Segade Cochón.
El foi o gañador dos nove que se presentaron ao concurso, dotado cun premio de 500 euros que será entregado este domingo, antes da capea que se celebrará na praza de touros.
É a primeira vez que se organiza un concurso destas características para escoller o cartel da feira taurina de Pontevedra que, nesta ocasión se celebrará entre os días 8 e 16 de agosto, e cuxas ternas foron anunciadas hai uns días.