Pola Avenida de Lugo comezou o despregamento dos novos contedores para depositar residuos. Operarios da compañía PreZero xa están a executar a substitución progresiva de todos estes recipientes, empezando polos reservados para reciclar papel e cartón.
Estes novos contedores foron deseñados por Formato Verde, unha empresa galega especializada en solucións para a recollida de residuos.
Estes traballos, segundo os cálculos da compañía, estenderanse durante as próximas cinco semanas tanto no centro urbano como nas parroquias.
Antes da colocación dos novos recipientes, os traballadores de PreZero foron limpando medio centenar de illas de reciclaxe para deixalas listas para esta instalación.
Ademais da Avenida de Lugo, as primeiras rúas nas que se están colocando estes contedores son San Mauro, Rúa da Carrasqueira, Loureiro Crespo, Rúa da Estrada, Virxinia Pereira, Maruja Mallo, Diego Sarmiento, Benito Corbal, Sagasta e Peregrina.
Tras completar a substitución dos 496 contedores azuis, o plan continuará cos amarelos (envases lixeiros), grises (fracción resto), verdes (vidro) e marróns (residuos orgánicos).
Os novos recipientes, que son máis modernos e accesibles, terán unha capacidade de entre 2.800 e 2.900 litros, lixeiramente superior á actual.
Instalaranse dous modelos distintos: un de tamaño estándar para áreas urbanas e outro máis estreito, pensado para zonas rurais con limitacións de espazo.
En total, instalaranse preto de 4.000 novos contedores, que xa se están preparando nas instalacións da empresa PreZero, concesionaria do servizo.
