Con moitos nervios pero, sobre todo, con moita emoción. Así viviron os novos inquilinos da promoción de vivenda pública que a Xunta construíu en Valdecorvos a entrega das chaves dos 74 novos fogares que formarán a partir de agora.
"Pensei que este día non ía chegar nunca", recoñeceu Miriam, unha das persoas adxudicatarias destas vivendas, que se concederon en réxime de aluguer e polas que pagarán rendas mensuais que oscilan entre os 130 e os 180 euros.
Ela, como o resto dos novos veciños destes catro edificios na Rúa Prado Novo, asinou un contrato de aluguer por sete anos. "Isto é un alivio. Non ten outro nome. É un teito e con garantía dun prezo asequible", engade esta pontevedresa.
Miriam, que vivirá no seu piso xunto á súa parella e ao seu sogro, recoñece que tivo sorte. Levaba só uns meses apuntada no rexistro como demandante de vivenda. Algo máis, preto de dous anos, tivo que esperar Sandra para conseguir a súa.
Antes de recoller as súas chaves aseguraba que "estamos ansiosos por entrar" e poder iniciar unha nova etapa vital xunto ao seu marido e aos seus dous fillos. "É unha nova oportunidade. Estamos todos súper agradecidos, a verdade", engadía ao comezo do acto.
"É un soño que se fixo realidade", destacaba pola súa banda Aroa Flores, en lista de espera desde hai doce anos. Xa puido ver a súa vivenda e asegura que "non esperaba tanto, é unha pasada, moi bonita e moi completa".
Chegará a Valdecorvos xunto ao seu marido e aos seus dous fillos, igual que Jéssica e Roberto, unha parella con dúas nenas para quen o de hoxe "é o mellor día da nosa vida" e o inicio dunha nova aventura vital. "Cámbianos todo moitísimo", afirmaban.
A ese mesma reflexión, sobre todo ao feito non ter que preocuparse de como pagar un aluguer cada vez máis desorbitado, sumouse Iris, que residirá no barrio coa súa filla e que destacaba que "pasas de non ter nada a de súpeto ter un piso".
Aínda que todos eles poderán entrar xa nas vivendas asignadas non terán que pagar as súas rendas até setembro para que fagan a mudanza "con tranquilidade". Así o explicou a conselleira de Vivenda e Planificación de Infraestuturas, María Martínez Allegue.
Estas 74 familias, segundo Martínez Allegue, "dará cor e alegría a un barrio emerxente e cada vez máis cheo de vida" e que seguirá crecendo nos próximos meses co resto de promocións de vivenda pública que impulsa o seu departamento.
"Hoxe é un día moi feliz. Só hai que ver as caras dos que recollestes as chaves", apuntou o presidente da Xunta, Alfonso Rueda, que celebrou que os novos moradores teñan agora a súa vida "encarrilada" ao solucionar os seus problemas de vivenda.
Na súa intervención, Rueda destacou as historias diferentes destes novos inquilinos, entre eles xente nova "que empeza unha nova vida" ou persoas que levan moito tempo "sufrindo as consecuencias do cara que está a vivenda".
A eles sumou cidadáns que chegaron a Pontevedra "ás veces desde moi lonxe" para labrarse un futuro "como fixemos moitos galegos" na época da diáspora. Uns e outros, engadiu o presidente, "son xente que realmente o necesita".
O titular da Xunta celebrou especialmente que as primeiras 74 chaves que entrega o goberno galego, dentro das 4.000 vivendas comprometidas nesta lexislatura, déronse "na miña cidade", en Pontevedra.
"Espero que en poucos meses esteamos a entregar máis vivendas", afirmou Alfonso Rueda, para quen Valdecorvos é un barrio "que vai coller moito máis impulso".
Engade Pontevedra Viva como fonte preferida de Google de balde
Mantente informado coas últimas noticias de actualidade.