O Concello de Ponte Caldelas mantense á espera da intervención do seguro para levar a cabo o arranxo do céspede do campo de fútbol, que se viu seriamente danado debido ao temporal da última semana. Así o confirmou o alcalde do municipio, Andrés Díaz, que tamén apuntou que o goberno local ordenou a reconstrución de dous muros de contención nas parroquias de Xustán e Taboadelo.
O rexedor socialista sinalou que dos diversos muros que se derrubaron con motivo do forte temporal, ao Concello correspóndelle arranxar eses dous e espera que estean finalizados nesta vindeira semana, do mesmo xeito que o arranxo do céspede.
Andrés Díaz reclama tamén que a Xunta de Galicia interveña na limpeza do río Verdugo porque cada vez que se produce unha crecida derivada do temporal, é o Concello quen asume a limpeza de ramas e demais elementos da canle do río.
Desde o goberno local establecen que os gastos derivados das últimas inclemencias meteorolóxicas ascenden a preto dos 20.000 euros.