Uns 70 voluntarios participarán esta fin de semana na primeira recollida solidaria de alimentos que organiza este ano o Banco de Alimentos de Pontevedra.
Será a iniciativa coñecida como 'zampakilos solidario', que se organizará na trintena de supermercados que o grupo Vegalsa-Eroski ten na provincia, entre outras localidades, en Pontevedra, Marín, Cambados ou Lalín.
De todos eses voluntarios, en Pontevedra haberá 25, mentres que en Marín, Cambados e Lalín haberá outros 15 en cada unha delas.
As doazóns de alimentos, que se recollerán este venres e sábado, 11 e 12 de marzo, poderán realizarse de maneira mixta: entregando comida non perecedoira aos voluntarios presentes ou facendo achegas económicas ao pasar por caixa.
Con este ' zampakilos solidario', o Banco de Alimentos tenta ir retomando este tipo de iniciativas despois de dous anos nos que, por motivo da pandemia, se rebaixaron substancialmente.