Corenta colectivos sociais de Pontevedra, que atenden a unhas 5.000 persoas en situación de vulnerabilidade, recibiron os 200.000 quilos de comida que o Banco de Alimentos repartiu nas distintas localidades da comarca de Pontevedra durante 2019.
Con toda esta actividade, o almacén que a fundación ten na rúa Faustino Santalices de Pontevedra permitiu cubrir o 35 por cento das necesidades básicas das persoas que, por distintos motivos, non atravesan o seu mellor momento.
A cifra de alimentos repartidos en Pontevedra forma parte dos preto de 1,8 millóns de quilos de comida contabilizados e entregados en toda a provincia.
O próximo mes de marzo retomaranse en Pontevedra as tradicionais operacións quilo do Banco de Alimentos para poder seguir facendo provisión de produtos de primeira necesidade.
A ONG, que este ano cumprirá 25 anos de actividade, sinala que é necesario volver botar man deste tipo de accións solidarias coas que a entidade poida seguir facendo provisión de produtos básicos.
Son alimentos como o leite, o aceite, as galletas, o cacao ou tipo de conservas os máis demandados polas entidades e que, a día de hoxe, comezan a escasear nos andeis dos almacéns tanto de Vigo como de Pontevedra.