O campus de Pontevedra da Universidade de Vigo completou este xoves o proxecto iniciado no curso 2015-2016 de substituir o gasóleo polo gas natural como combustible nas calefaccións das diferentes facultades e escolas.
O proceso forma parte do proxecto Green Campus, no que a universidade se comprometeu a impulsar medidas que promovan a sustentabilidade e o respecto ao medio ambiente, e polo que pasou a ser en novembro de 2015 o primeiro campus de España coa bandeira verde da asociación ADEAC da Foundation for Environmental Education (FEE).
O proceso completouse este xoves coa entrada en funcionamento na Escola de Enxeñaría Forestal. Como valoración, o vicerreitor, Juan Manuel Corbacho, indicou que permite pechar o ciclo dentro da filosofía e dos plans de acción do Green Campus, co que "cumprimos outro paso máis no camiño cara ser un campus máis sostible e un campus que traballa e fomenta a eficiencia enerxética".
O sistema xa funcionaba nas facultades de Ciencias Sociais e da Comunicación e de Ciencias da Educación e do Deporte, Belas Artes e Fisioterapia e permite reducir as emisións de CO2 á atmosfera nun 20% e vantaxes en materia de eficiencia enerxética.
Corbacho; a subdirectora da EE Forestal, Ángeles Cancela; e os responsables da Unidade Técnica da Universidade, José Antonio López e Antonio Medrano, acudiron este xoves á posta en funcionamento dos novos queimadores que, empregando as caldeiras xa existentes, permiten comezar a consumir xa este combustible.
O responsable da Área de Planificación do campus, Celso Cancela, destacou que a medida está en perfecta sintonía coa política ambiental da Universidade de Vigo en xeral e do Green Campus en particular, e que se iniciou nos centros que tiñan un maior consumo.