Ángel Moldes, candidato á alcaldía de Poio polo Partido Popular chegou a un acordo de colaboración coa xerente do Grupo Pescamar, Lupe Murillo, para aproveitar os recursos da fábrica de conservas para acometer a creación dunha piscina no proxecto deportivo da Reiboa, que promove o PP.
Nos encontros coa xerente e parlamentaria popular, Moldes comprobou que Pescamar utiliza vapores que poden reducir o custo do mantemento da instalación deportiva como xa fai a propia empresa para reutilizalos como calefacción de toda a fábrica.
A idea do candidato popular é aproveitar o ximnasio que xa se atopa na Seca e concentrar as instalacións deportivas na mesma contorna e situalas nun lugar central para o Concello de Poio.
Sinala que este proxecto é totalmente realista e executable durante o vindeiro mandato. A súa proposta iniciaríase coa aprobación do proxecto e a adaptación urbanística de toda a contorna. Neste sentido, critica que durante a última década o goberno do BNG e do PSOE non adaptara o PXOM e, por este motivo, a súa idea céntrase en aprobar un Plan Especial de Usos que acurtaría os prazos para a creación do complexo deportivo.
Moldes pretende involucrar a todas as administracións para a financiación do proxecto. Realizaríase unha construción por fases. A primeira sería a de acometer a obra do Pavillón e, a continuación, remodelaríase o ximnasio e construiríase a piscina. Todo o espazo complementaríase cun parque infantil.