A presidenta da Deputación de Pontevedra, Carmela Silva, destacou que o Centro de Acollida e Protección de Animais (CAAN) é "unha referencia a nivel do Estado en benestar animal, que é a súa sinal de identidade".
A presidenta provincial visitou este xoves o centro dependente da Deputación para coñecer o novo equipo de radiodiagnóstico veterinario co que a institución acaba de dotar ao centro, que se converte, como subliñou a presidenta, "no único que ten un equipamento tan avanzado".
Carmela Silva amosou, xunto ao persoal do centro encabezado polo veterinario xefe, José Luis Pedreira, e o deputado provincial Manuel González, os novos equipos cos que se axilizará e mellorará amplamente o diagnóstico e os tratamentos dos animais do CAAN.
Ademáis da sustentabilidade do equipamento, que reduce os residuos contaminantes, José Luis Pedreira destacou que o equipo dixital "permite complementar en calidade o diagnóstico en imaxe". Hai que lembrar que nas obras de mellora que realizou o pasado ano a Deputación incluíse a reforma da sala de clínica, coa creación dun novo quirófano e unha sala de raios X que é a que agora se completa cos novos equipos.
EXCEPCIONAL RITMO DE ADOPCIÓNS
Carmela Silva destacou na súa visita o traballo "e compromiso" que está a realizar o persoal do CAAN e que avalan tamén "as boas novas" sobre adopcións que leva o centro de novo este ano. Así, desde xaneiro e ata o 23 de maio saíron cara a un novo fogar 285 cans, unha cifra "espectacular" que supón máis do dobre que as do mesmo período do 2020 (133) e tendo en conta que precisamente o pasado ano se acadou o récord de adopcións no centro, con 583.
E aínda que a tendencia é descendente seguen a producirse abandonos de cans. Ata o 23 de maio lévanse 426, 13 menos que o ano pasado neste mesmo período.
Carmela Silva fixo un chamamento a cidadanía "non abandonen animais, é unha mala praxe como xénero humano. E veñan ao CAAN e adopten. E temos un reto como provincia, temos que adoptar a estes cans e cadelas que son máis maiores ou levan moito tempo aquí. Aínda que teñan o mellor trato, están mellor nun fogar".
Hai que lembrar que as adopcións no CAAN son gratuítas e os animais saen do centro vacinados, con chip, desparasitados e esterilizados. O persoal asesora ás persoas sobre o can que pode adaptarse mellor ás súas necesidades.
Para visitar o centro como para formalizar as adopcións hai que solicitar cita previa no teléfono 986 140 360 ou no 886 217 391.