O CIFP de Hostalería Carlos Oroza estreou novas instalacións tras a construción dun novo volume de case 1.700 metros cadrados, formado por un baixo e outras dúas plantas. O conselleiro de Educación e Cultura, Román Rodríguez asistiu á inauguración destes novos espazos que contan cunha cociña demostración na planta baixa, cun economato e un almacén con cámaras de frío. Na primeira planta instalouse un aula-taller de cociña.
Estes traballos forman parte da primeira fase das obras nas que a Consellería investiu máis de 1,2 millóns de euros. Está previsto que se acometa unha segunda fase coa creación de talleres de panadería e pastelería, ademais de confeitería e chocolatería no segundo piso.
Segundo informa a Consellería, o Carlos Oroza é un centro pioneiro á hora de desenvolver proxectos de FP Dual, nos que se compatibiliza a formación no centro coa realizada en espazos de traballo reais para preparalos de fronte ao mundo laboral.
Román Rodríguez destacou a posta en marcha dunha iniciativa que se está desenvolvendo no centro para investigar novos usos culinarios da lapa, ademais doutro proxecto orientado a obter fibras vexetais para que se empreguen como ingrediente alimentario.