Marín Black Weekend. Así se vai a denominar a nova feira de oportunidades que o comercio local do municipio organizará os días 25, 26 e 27 de novembro, coincidindo cunhas datas nas que se aplican descontos e promocións, motivadas polo "Black Friday" e o "Ciber Monday".
Este foi un dos acordos adoptados na xuntanza que a mesa local de comercio de Marín mantivo este luns, presidida pola alcaldesa da vila, María Ramallo.
Os comerciantes defenden a organización da feira ante a situación actual do mercado que, entre a inflación, a crise enerxética ou a subida de materias primas, provocou un retraemento no consumo e a acumulación de stocks nos establecementos comerciais.
Serán dezaseis os comercios que participen nesta feira, que estará aberta ao público na carpa que instalará o Concello na Alameda, e que se utilizará posteriormente con motivo das actividades infantís do Nadal.
Alí estarán representados diferentes sectores, que ofrecerán descontos significativos nos seus productos.
Ademais, a mesa local de comercio informou favorablemente sobre o proxecto de dinamización que a asociación de comerciantes da Praza de Abastos de Marín presentou á convocatoria da Xunta para o impulso da Rede de Mercados Excelentes de Galicia.