O vindeiro xoves 28 de febreiro, o Consello Galego de Relacións Laborais acollerá un encontro entre a patronal do sector de ambulancias e os representantes sindicais para tentar que se chegue a un acordo para resolver o conflito actual que levou o persoal do servizo de ambulancias a manter oito días de folga.
No caso de que as negociacións se manteñan estancadas, CIG, CC. OO. e UXT convocarán unha semana máis de paros, entre o 4 e o 10 de marzo. Se a situación persiste, entón teñen previsto iniciar unha folga indefinida a partir do 20 de marzo.
Este luns, o alcalde de Pontevedra Miguel Anxo Fernández Lores recibía a representantes do comité de folga para ter coñecemento das súas demandas e das carencias que se rexistran tanto na comarca de Pontevedra como no Salnés en relación a este servizo.
Xabier Aboi, da CIG, sinalaba que desde 2016 non se actualizaron os salarios e lembrou que a situación se complicou para o sector programado das ambulancias desde que se cambiou como hospital de referencia o de Vigo polo de Santiago para a área sanitaria de Pontevedra. Esta decisión, adoptada polo SERGAS, provocou segundo o dirixente da CIG que a empresa que realiza este servizo entrase en perdas.
Aboi afirmaba que Marín precisa que a actual ambulancia de 16 horas que opera en Marín debería ter un horario ampliado a 24 horas, ademais de complementala con outra de 12 horas. E pola súa banda O Salnés, sinalou, precisa outra ambulancia medicalizada todo o ano alertando de que as actuais chegan a realizar 5.000 servizos anuais.
Indicou que na comarca de Pontevedra, as ambulancias realizan unha media diaria de 14 serivicios durante os 365 días ao ano, "unha auténtica locura". E as medicalizadas alcanzan case os 5 servizos cada día.
Pola súa banda, Alfonso Boullosa, de UXT, reclamou ao SERGAS unha cifra enriba da mesa destinada á próxima concesión prevista para o 15 de outubro. Sinala que esta é a única fórmula que lles permitirá chegar a un acordo coa patronal para alcanzar un novo convenio.
O alcalde de Pontevedra afirmou que o grupo do BNG tentará levar a pleno unha moción para que o SERGAS asuma a responsabilidade de que as empresas que optan aos concursos cumpran co previsto e garantan que o persoa conte cun salario digno e evítense situacións como a actual, que cualificou como "extrema".