O alcalde de Cerdedo-Cotobade, Jorge Cubela, impulsa estes días cos técnicos municipais un proxecto que verá a luz no verán e que irá orientado a poñer en valor e difundir as igrexas do romático no municipio.
O proxecto xirará en torno ás igrexas de San Martiño de Rebordelo, Santa María de Sacos e Santa Mariña de Tomonde e o mosteiro de San Pedro de Tenorio e reforzarase coa edición de trípticos monográficos sobre os elementos arquitectónicos e artísticos que posúen estes edificios relixiosos.
Ademais, establecerase un servizo de guías para as persoas que se acheguen ata cada unha destas igrexas
A intención do alcalde é que este traballo teña un aproveitamento desde o punto de vista da dinamización económica do municipio a través da atracción de turistas que se acheguen ata as Terras de Pontevedra na procura de ofertas turísticas relacionadas coa natureza e a arte.
Esta iniciativa complementarase coas xa iniciadas con anterioridade como foron a recuperación das pontes medievais sobre o río Lérez (Serrapio-Pedre, Fentáns e Parada de Cerdedo) e a actuación en profundidade en varios petróglifos nos que o Concello investiu uns 40.000 euros.
A oferta turística no entorno do río Lérez completarase cunha segunda actuación duns 50.000 euros a través do Pacto pola Paisaxe, que mellorará o entorno da ruta entre Cabanca e Cavadosa, así como con varias rutas de sendeirismo que cohabitarán cos Roteiros Saudables de Almofrei, Augasantas, Borela, Carballedo, Cerdedo, Famelga, Parada de Tenorio, Quireza, Valongo e Vilanova e tamén coa recuperación e posta en funcionamento dos Baños do San Xusto.