A Consellería de Economía e Industria está a traballar en dúas liñas para manter a fábrica de Tafisa en Ponte Caldelas, segundo informou este mércores o conselleiro Francisco Conde aos representantes do comité de empresa durante a reunión mantida en Santiago.
Por un lado, o titular de Industria intenta que o Grupo Sonae poida dar marcha atrás na súa decisión de pechar a fábrica da Reigosa a través dun plan de viabilidade. O representante da Xunta indicou hoxe aos sindicatos que leva xa dúas reunións con directivos da empresa e que, ao longo desta semana, manterá unha terceira con membros do consello de administración do Grupo Sonae coa intención de ofrecerlles ferramentas que poidan garantir o futuro da empresa na provincia de Pontevedra. E se esta opción non prospera, Francisco Conde indicoulle aos membros do comité que tamén está a traballar na busca dun inversor que poida estar interesado en manter a actividade da fábrica.
O presidente do comité de empresa, José Manuel Moledo, á saída do encontro co conselleiro indicou que o responsable de Industria tamén lles manifestara que calquera solución é moi complicada porque "cando unha multinacional decide cerrar é complicado que dea marcha atrás". Moledo reclamou da Xunta que tamén solicite garantías á empresa da continuidade da fábrica de Betanzos por se é necesario o traslado dalgúns traballadores de Ponte Caldelas ata esa factoría dentro do plan de viabilidade.
Nas próximas horas está previsto que a Xunta propoña un mediador laboral á empresa e aos traballadores para que poida regular as próximas reunións sobre o peche da fábrica. Esta proposta será un dos puntos principais do encontro de mañá no Hotel Rías Bajas a partir das 17.00 horas. Os traballadores manterán, como veñen facendo nas últimas semanas, concentracións e manifestacións de protesta no ámbito da rúa Castelao e Peregrina.