Os parques de bombeiros comarcais xestionados por Matinsa (Bueu, O Porriño, Ribadumia e Vilagarcía de Arousa) asinaron o seu primeiro convenio colectivo dentro do Consorcio provincial.
Este Consorcio está formado pola Xunta de Galicia e a Deputación de Pontevedra cunha representación do 50% cada unha, pero ten unha xestión privada da empresa Matinsa.
Os catro sindicatos con representación no comité de empresa: UGT, Comisións Obreiras, CIG e Sibgal, asinaron por unanimidade este acordo que regula as condicións laborais dos 73 traballadores destes parques para os próximos catro anos.
No caso dos parques do Porriño e O Salnés o convenio xa estaba vencido mentres que seguía vixente en do Morrazo.
Adrián Pena, delegado de UGT na negociación, valorou o convenio como moi positivo e considerou que esta experiencia é extrapolable ao resto de Galicia. De feito avogou pola creación dun convenio marco galego.
Matinsa, é a empresa que se fixo coa xestión do consorcio de bombeiros de Pontevedra, o resto, os bombeiros dos parques de Pontevedra e Vigo continúan sendo empregados públicos.
Unha circunstancia que consideran que debe ser corrixida para que estes parques municipais poidan ofrecer unha cobertura maior e completar o mapa de emerxencias, que, segundo comentaron, necesitaría dous parques de bombeiros a maiores para que o mapa de emerxencias de Galicia quede ben compensado en canto aos tempos de resposta e póidase dar un mellor servizo.
Nunha rolda de prensa en Pontevedra, Adrián Pena xunto a Hugo Sánchez responsable sectorial oficinas e despachos FeS UGT Galicia, sinalaron que os bombeiros dos parques municipais de Pontevedra e Vigo cobran entre 4.000 e 6.000 euros ano máis que calquera dos seus compañeiros no consorcio.