Os veciños da zona de San Mauro xa perderon a conta da cantidade de veces que un coche danou o cruceiro situado diante a capela. O último foi este mércores 4 de setembro e, de novo, este elemento patrimomial está valado.
Desde hai tempo, a zona situada xusto diante do templo converteuse nun lugar habitual de aparcamento e os vehículos que estacionan aí, ao realizar manobras, acaban danando a base do cruceiro.
O último caso sucedeu este mércores pola tarde, aínda que os veciños descoñecen a hora e circunstancias exactas. "Ao mediodía estaba perfecto e, cando volvín de traballar, estaba valado", relata un dos veciños cansos xa de tantos accidentes.
Tampouco a Policía Local coñece as circunstancias nin sabe quen foi o responsable. Segundo confirmaron fontes oficiais, tiveron noticias dos danos ao cruceiro e unha patrulla policial achegouse ao lugar para valalo e evitar que houbese danos maiores ou resultasen afectadas persoas que se movesen pola zona.
Os veciños non teñen dúbida ningunha de que volveu ser un coche, pois está danada a base, que corre risco de moverse e mesmo caer, pois a estrutura cambalea. Co impacto, desprazáronse un pouco a base e o capitel.
Os veciños non ocultan o seu enfado polo frecuentes destes incidentes, pois hai tan só mes e medio que repararon este cruceiro. En maio sufrira un impacto dun coche e permaneceu valado durante meses ata que hai unha semanas se reparou.
"Aguantou mes e medio", sinala un veciño, que lembra que "leva xa varias reparacións porque os coches danse e alá vai...".
O cruceiro está situado xusto diante da capela de San Mauro, nunha praza que pertence á Igrexa e que, ao non estar pechada, converteuse en aparcamento.
O enfado veciñal tamén está dirixido a este uso dunha praza que debería ser peonil e para dar servizo ao tempo, pois "os coches aparcan de calquera forma".
Este mesmo mércores, un coche estaba aparcado xusto diante da porta da capela e déronse xa ocasións nas que "se queres acceder á capela, non podes". Hai tres meses, durante un funeral, "o cadaleito case non entraba porque había un coche aparcado".
Engade Pontevedra Viva como fonte preferida de Google de balde
Mantente informado coas últimas noticias de actualidade.