A concesionaria do servizo de limpeza en Pontevedra, Cespa, reforzou o dispositivo especial de limpeza para as peñas no seu segundo e último fin de semana de aplicación.
A coincidencia co inicio oficial das Festas da Peregrina motiva a participación cada un dos días de seis traballadores máis, ata un total de 55, e a mobilización de 19 máquinas de diversa índole para manter en perfectas condicións de limpeza e hixiene o centro histórico da cidade, distribuíndo o operativo do seguinte xeito: 28 operarios a pé, 3 sopradoras, 7 varredoras, 3 lava-beirarrúas, 3 camións de recollida de lixo e 3 cisternas.
O dispositivo divídese en catro sectores aos que se prestará especial atención: Campiño de Santa María, Praza do Teucro, Praza da Ferrería e o ámbito das atraccións das festas en Alameda, Raíña Vitoria e Palmeiras.
Este operativo excepcional complétase co habitual servizo de limpeza e recollida no resto da cidade.