Un recoñecemento ao estado do edificio administrativo da Xunta en Benito Corbal "para comprender un pouco máis o que se quere facer nel". Así definiu o vicepresidente do goberno galego, Alfonso Rueda, a visita que realizou este luns a un inmoble que será rehabilitado de forma integral, cun investimento próximo aos 4 millóns de euros. O obxectivo é que estea en funcionamento ao longo de 2018.
Rueda, que estivo acompañado do conselleiro de Facenda, Valeriano Martínez; o alcalde de Pontevedra, Miguel Anxo Fernández Lores; ou o reitor da Universidade de Vigo, Salustiano Mato; sinalou que os técnicos das tres administracións están a tratar de "pechar o anteproxecto" para poder licitalo e empezar as obras cando antes. "Se somos dilixentes, poderemos manter os prazos sen ningún problema", dixo.
Nas tres primeiras plantas deste edificio de case 6.000 metros cadrados, a Xunta situará as oficinas de emprego que ata agora están en Eduardo Pondal, concentrando neste espazo toda a atención aos cidadáns; mentres que as plantas terceira e cuarta serán cedidas a entidades e asociacións de interese social e sanitario un espazo para situar as súas oficinas e locais.
As catro plantas superiores do edificio serán cedidos á Universidade de Vigo. O reitor explicou que os seus arquitectos xa definiron un programa concreto de necesidades sobre o que xa están a traballar cos técnicos da Xunta. Será para eles, un "salto cualitativo" na relación da universidade coa cidade de Pontevedra, segundo Salustiano Mato.
Ademais de albergar a sede corporativa do Campus Crea, espazos de coworking e a incubadora de proxectos ligados á industria creativa e cultural, Mato avanzou que a universidade terá espazos demostrativos e espazos académicos ligados á oferta común do campus, como idiomas, a educación de maiores, seminarios, conferencias, eventos ou actividades científicas, para as que "espremeremos a tope" o salón de acto.
A Universidade de Vigo prevé crear tamén neste edificio unha escola de emprendedores que permitirá á institución educativa "intensificar a nosa relación co tecido empresarial", un aspecto que, segundo explicou o reitor, é unha "vocación" da universidade.
Con todas estas vimbias, o edificio da Xunta de Galicia terá unha nova vida. E por iso, o alcalde de Pontevedra, Miguel Anxo Fernández Lores, mostrou a súa satisfacción, a pesar de lamentar que "se tardase tanto tempo" en darlle uso a estas instalacións. Agora, sinalou, espera que se cumpran os compromisos adquiridos e se poña un valor un inmoble que "estaba perdido e agora está hallado".
DETALLES DO PROXECTO
A remodelación da antiga sede da Xunta en Pontevedra incluirá a substitución da fachada por un revestimento de aluminio. Isto servirá, segundo o goberno galego, para acabar cos problemas de humidade que afectan as paredes, as ventás e a cuberta do edificio, cuxa última remodelación foi en 1982. Tamén se cambiará a carpintería metálica por outra con dobre acristalamiento.
Outra das grandes novidades da reforma ten que ver coa accesibilidade. O inmoble manterá os tres accesos desde a rúa, que agora pasarán a ser totalmente accesibles. Ademais, cambiaranse os catro ascensores de catro prazas -ningún deles accesible- por dous ascensores de oito prazas, facilitando o seu uso a persoas con mobilidade reducida, unha vantaxe máis deste cambio é que se gañará espazo útil.
O edificio contará cun núcleo central de comunicacións, o que permitirá utilizar o inmoble a calquera hora, mesmo nas plantas altas do edificio. Con esta distribución bastará con pechar as portas necesarias para facilitar o acceso exclusivamente a aquelas zonas que, por exemplo, funcionen en horario de tarde ou na fin de semana.
Ademais, en cuestións de eficiencia enerxética, instalaranse illantes na cuberta e na fachada e un sistema de ventilación natural e forzado, que conseguirá mellorar a calidade do aire interior ao recuperar a calor ou disipala en función da época do ano. Tamén se instalará un sistema para reutilizar a auga de choiva para as cisternas dos WC, placas solares térmicas para crear auga quente sanitaria e seis caldeiras de biomasa para a calefacción.