A portavoz do Goberno, Anabel Gulías, deu conta da chegada á Alcaldía do Concello de Pontevedra dunha invitación oficial para participar nunha mesa sobre Urbanismo no Foro Iberoamericano de Cidades, que se celebrará entre o 28 e o 30 de xuño na cidade de Querétaro, México.
O convite chega por parte do Instituto ICEX España Exportación e Inversiones, dentro do Ministerio de Industria, Comercio e Turismo.
Anabel Gulías informou que "de xeito expreso nos convidan para falar do modelo de cidade, da transformación urbana e máis concretamente nas accións iniciadas no centro histórico, pois consideran que é un exemplo ‘inspirador’ e que pode ter certas solicitudes co que está a acontecer en Querétaro".
A edil sinalou que Querétaro esta considerada como unha das cidades con maior crecemento do país e "quere centrar o seu modelo de xestión e deseño dos espazos públicos traballando no centro histórico como base, un espello do que pode aproveitar a totalidade da poboación".
O Foro Iberonamericano de Cidades conta con máis de 100 expertos internacionais e máis de 200 empresas, tanto de México como do Estado Español.
"Que o ICEX se interesase por Pontevedra é un aval importante ao traballo desenvolvido e unha nova oportunidade para a promoción internacional da cidade e, por suposto, unha oportunidade de intercambiar experiencias con expertos na materia", dixo a voceira municipal.
Os gastos de transporte e aloxamento estarían cubertos polo ICEX.