A subdelegada do Goberno en Pontevedra, Maica Larriba, informou este martes do adianto por parte do Ministerio de Facenda e Función Pública do abono de 3.973 facturas e certificacións de obra que 7 concellos da provincia tiñan pendentes de pago por valor de 4.347.034 euros.
Entre estes concellos beneficiarios da medida atópase o de Cuntis que percibirá 608.409 euros.
"Esta medida pretende favorecer a liquidez das arcas municipais", explico Maica Larriba. Ao mesmo tempo, o Executivo central coopera cos concellos para afrontar as débedas pendentes coas economías de autónomos e pequenas empresas, "que en gran parte estaban asumindo os efectos negativos destes impagos", segundo sinalou a subdelegada.
Este abono forma parte do Mecanismo Extraordinario aprobado polo Goberno en xaneiro deste ano para facilitarlles aos gobernos locais o pago destas débedas, todas elas anteriores a xullo de 2021.
Maica Larriba subliñou o "importante impacto deste mecanismo na provincia de Pontevedra", que é a máis beneficiada de Galicia, xa que absorbe o 48,3% dos 8.994.409,48 de euros que o Ministerio de Facenda destina ao conxunto da Comunidade no marco deste procedemento.