O grupo municipal do PSdeG-PSOE, a través do concelleiro Iván Puentes, presentará no pleno deste mes unha moción na que solicita ao Concello de Pontevedra que as tres vivendas abandonadas situadas na cabeceira norte da ponte do Burgo sexan adquiridas para convertelas nun novo albergue de peregrinos.
O concelleiro socialista, acompañado polo portavoz Tino Fernández e por Paloma Castro, apuntaba que esta proposta permitirá crear unha instalación na que se podería dar cobertura a ao redor dun centenar de visitantes, fronte aos 56 que acolle o actual albergue. Esta iniciativa conta co visto e prace da asociación de Amigos do Camiño Portugués a Santiago, segundo explicou Tino Fernández, portavoz socialista.
Esta localización, segundo o PSOE, sería positiva para dinamizar a zona onde está prevista a construción da praza do Burgo e permitiría os peregrinos achegarse ata o centro histórico para ver espazos de atractivo turístico, ademais de consumir nos locais desa contorna creando actividade económica. Nese sentido, Puentes indicaba que o actual albergue, ao atoparse a un quilómetro do centro da cidade, dificulta que os peregrinos se acheguen para facer gastos na zona monumental.
Tino Fernández apuntou que estas vivendas contan cun xardín no que mesmo se poderían instalar tendas de campaña. Na proposta socialista contémplase que, unha vez que o Concello adquira os inmobles, se inste á Xunta de Galicia para que colabore no financiamento necesario para a rehabilitación e posta en funcionamento do novo albergue para antes do Xacobeo 2021.
As instalacións actuais situadas en Otero Pedrayo, segundo os socialistas, atópanse completas a partir do mes de abril e a súa idea é que, no futuro, convértase nun albergue secundario.
RESPOSTA DO GOBERNO LOCAL
Demetrio Gómez, concelleiro do goberno local, indicou que o proxecto de reforma da contorna do Burgo non contempla unha partida destinada á adquisición das tres vivendas. Sinalou que os técnicos municipais suxeriron esa posibilidade que, polo momento, o goberno local non estudiou.
Ademais, o concelleiro sostén que a proposta socialista presenta dificultades xa que Patrimonio da Xunta de Galicia establece usos restritivos para estos inmobles.