A apertura de plicas constatou que son doce as empresas que optan ao concurso para a construción do futuro Centro social do Burgo, unha obra que sae a licitación cun orzamento de 639.902,97 euros, segundo lembra o portavoz do Goberno local e concelleiro responsábel de Contratación, Raimundo González.
As empresas que concorreron ao concurso son as seguintes:
- Construcciones Emi Álvarez SL
- Construcciones Abal
- Inelsa
- CPA (Construcciones y Proyectos Abilleira SL)
- GPD Construcciones
- Ediserpo
- Construcciones Gómez Crespo
- Prado Lameira SL
- Coviastec SL
- Elsamex
- Copcisa
- Emergis UTE CruzVal SL
Abertas as plicas, agora é tempo da avaliación técnica das ofertas.
O futuro Centro Social de O Burgo ocupará 1.087 metros cadrados no campo de Pasarón. No soto contará con espazos para almacéns e armarios diferenciados para a asociación de veciños e para o CF Pontevedra. No primeiro andar disporá dun vestíbulo e zona de estancia de 111,50 metros cadrados, unha aula social de 62,40 metros e un salón multiusos de 97,05 metros, entre outras dependencias. Estes espazos estarán destinados a actividades, cursos, obradoiros... polo que se inclúe unha cociña-aula solicitada pola asociación.
O obxectivo é crear un centro accesible e intelixente dende un punto de vista social, económico e enerxético, e totalmente independente do estadio de fútbol de Pasarón. Para garantir a perfecta separación co campo de fútbol, xerouse unha nova entrada para o centro veciñal. Esta independencia, a desconexión total dos espazos, foi unha demanda coincidente da Asociación Cultural O Burgo e do club e quedou recollida no proxecto.