Os dous 'xardíns que falan', as áreas verdes reivindicativas situadas na Praza de España e na Praza de Ourense, xa están engalanados cos motivos propios do Nadal.
A decoración do xardín da Praza de España, xusto enfronte da casa consistorial, está presidida por un arco de follas de ticea cunhas campás de luz, un reno luminoso, varios abetos e diversas flores de Pascua, coa radiante cor vermella que as caracteriza.
No caso da Praza de Ourense, nos xardíns de Casto Sampedro, instalouse un banco vermello con luces, varios acebos, uns pequenos Papás Noel pintados sobre troncos de madeira ou uns orixinais paquetes de regalo de madeira con luces.
A decoración complétase cunhas sinais que dán a benvida ao Polo Norte e indican a dirección que debemos tomar para chegar ao Galpón dos Renos e ao Obradoiro de Santa Claus.
Non será a última sorpresa destes xardíns. Xa que, unha vez pase o temporal, colocarase un Papá Noel de 1,50 metros, un tamaño case natural do home máis célebre de Laponia, que acompañará aos pontevedreses de cara á próxima Noiteboa.
Desde o Concello animan a que os cidadáns fagan uso destes escenarios e compartan as súas fotografías nas redes sociais baixo os cancelos #NadalPontevedra2022, #XardínsdeNadal e #XardínsqueFalan.