Coa abstención de toda a oposición, o Partido Popular aprobou este mércores no Parlamento galego unha iniciativa na que insta á Xunta a que se dirixa ao Concello de Ponte Caldelas para que se adopten as medidas necesarias co fin de evitar o peche do Centro de Información á Muller (CIM) deste municipio.
A deputada popular Paula Prado criticou que é a "primeira vez que pecha un CIM en Galicia", unha "liña vermella que non se debería cruzar nunca", porque o goberno municipal "pon por diante outros intereses aos das mulleres de Ponte Caldelas". Todo iso, mentres a Xunta "non só mantivo os recursos dos CIM, senón que os incrementou".
Durante o debate, a deputada socialista María Pierres reprochou que "o PP non é quen de dar leccións de igualdade ao PSOE". Sobre esta cuestión asegura que se vai a "pospoñer a continuidade do CIM ata o ano que vén, non pechar".
Respecto diso, Pierres sinalou que detrás desta problemática atópanse cuestións de "índole laboral" das traballadoras do centro, nun asunto "herdado" que está "en proceso de resolución". Así mesmo, un servizo integral de asesoría legal atende a vítimas de violencia machista mentres non se reabre o CIM.
Pola súa banda, Paula Quinteiro de En Marea, afirmou que "non se pode consentir que se peche ningún destes centros", aínda que considera que a Xunta debe facer un maior esforzo para a dotación de recursos materiais e humanos.
Olalla Rodil, do BNG, dixo que para facer a súa intervención ía tentar "non baixar ao terreo enlamado" no que Paula Prado "está instalada". Por iso, tras censurar o "uso político" do PP do peche do CIM de Ponte Caldelas, emprazou a que "non se deixe en solitario aos concellos na xestión deste servizo".
Finalmente, ante as acusacións da oposición ao PP de que non se preocupaba cando o CIM de Cambados, cando tiña goberno popular, "pechábase e abría" e "aparecía e desaparecía como o Guadiana", Prado xustificou que ese centro non se pechou, senón que se mancomunou para chegar a máis concellos.