O portavoz do Goberno local de Pontevedra, Raimundo González, apuntou que a elección de Jacobo Moreira como presidente local do Partido Popular durante o congreso celebrado este sábado 12 "non tivo moita acollida dentro dos propios militantes do Partido Popular".
O concelleiro do BNG sinalou que, a pesar de tratarse dunha cuestión interna dos populares, se sorprendera por Jacobo Moreira presentara o dobre de avais que de votos durante o seu proceso de elección. O novo presidente obtivo 115 votos cando conseguira 323 avais para presentar a súa candidatura.
"A maioría dos militantes do PP non foron a votar, non sei por que razóns, pero imaxino que non xenerou moito entusiasmo dentro da militancia e do Partido Popular", insistiu Raimundo González ao ser preguntado por este nomeamento.
O novo presidente local do Partido Popular tomou posesión durante este luns 14 do seu escano no Parlamento de Galicia. Compatibilizará o seu traballo como deputado coa actividade como xefe da oposición e presidente local do PP en Pontevedra.