O grupo provincial do Partido Popular esixiu ao goberno da Deputación de Pontevedra que renda contas sobre o plan de compostaxe do goberno que preside Carmela Silva.
Do mesmo xeito que fixeron "hai xa meses" os populares piden un informe que detalle os custos deste proxecto e os resultados que está a arroxar, segundo un comunicado que remitiron aos medios de comunicación.
"Os cidadáns teñen dereito a saber canto lles está custando a compostaxe e cales son os resultados reais deste plan", sinalou o deputado provincial do PP, Ángel Moldes.
"Tiveron tempo suficiente para realizalo e presentalo, entendemos que son datos que teñen que estar a manexar, pero a día de hoxe continuamos sen ningún tipo de información respecto diso", engadiu.
O PP afirma que máis aló do "márketing" a Deputación debe actuar con "seriedade e rigor" para xestionar os fondos públicos.