O portavoz do Partido Popular, Jacobo Moreira, visitou este martes a nave municipal do Concello de Pontevedra que se atopa en Campañó. Alí criticou a falta de rumbo do goberno do BNG en Pontevedra en relación á posta en marcha do plan de compostaxe.
Moreira critica os continuos erros na definición do proxecto e sinala que o goberno de Fernández Lores non ten un rumbo fixo cos composteiros e asegura que están a dar "paus de cego" e xogando co diñeiro dos pontevedreses.
Desde o PP denúnciase que a subministración de unidades modulares foi un concurso aberto, que finalizaba en marzo, por un importe de 142.000 euros e desde entón permanece paralizado. Afirman que Lores meteuse nunha lea co tema da compostaxe da que non sabe como saír.
Alegan tamén que a instalación das unidades modulares chegará con máis dun ano de atraso sobre as estimacións do goberno local e que o propio concelleiro César Mosquera recoñeceu a inexistencia do proxecto da planta da Canicouva.