Quince anos despois, o pregón das Festas da Peregrina regresa ao balcón da antiga casa do concello da Praza de España. Farao, a modo de 'aperitivo', para celebrar a rehabilitación integral deste inmoble, que entrou xa na súa recta final.
O 'chupinazo' das festas, que se trasladou ao Pazo de Mugartegui en 2008 -polas obras do aparcadoiro subterráneo-, servirá así de certa reestrea do edificio.
As obras no seu interior continuarán, previsiblemente, ata finais de ano, segundo explicou este mércores o alcalde de Pontevedra, Miguel Anxo Fernández Lores, polo que só poderán acceder as autoridades e a persoa que exerza de pregoeiro ou pregoeira.
O Concello estudará a posibilidade de ofrecer un petisco no hall do edificio, pero o que é seguro é que "máis alá da zona das escaleiras" non poderá acceder a cidadanía.
Os traballos de rehabilitación do inmoble están "moi avanzados", sinalou Fernández Lores, que celebrou que esta actuación estea a ser tan "respectuosa" coas modificacións que se fixeron no edificio deseñado e construído por Alejandro Rodríguez Sesmero a finais do XIX.
"Estou encantado con resultado", sostivo o rexedor pontevedrés, que asegurou que "todos temos moitas ganas de velo rematado" e de poder volver utilizar un edificio "emblemático e representativo" para toda a cidadanía pontevedresa.
DÚAS SEMANAS PARA REABRIR O SEU LATERAL
O que si estará terminado para as festas será a reforma integral que se realizou no lateral da casa do concello, no lugar no que estaban os baños públicos. Os valos que protexen esta zona serán retirados "en dúas semanas", segundo as autoridades municipais.
Tamén se quitarán os valos da fachada principal da casa do concello, non así as que protexen a entrada pola Rúa Alhóndiga, ao continuar as obras varios meses máis.
Toda a zona entre a casa do concello e o inicio da Avenida de Santa María quedará "radicalmente modificado", segundo o edil de Obras, César Mosquera, o que fará que todo este espazo "pareza moito máis amplo". Desaparecerá ademais o chanzo para maior accesibilidade.
O espazo dos baños foi reacondicionado para albergar instalacións climáticas da casa do concello e a súa superficie contará con bancos e mobiliario urbano "gañando para a cidade un espazo que estaba infrautilizado e que tiña un difícil sostemento", subliñou Mosquera.
"Este é o tipo de obras que me encantan e que hai que facer con cariño porque completan cidade e fan que estea máis integrada e bonita", sentenciou o edil, que explicou que esta zona superior do centro histórico "quedará xa toda reformada".