As intensas choivas das últimas horas deixaron incidencias tamén no mundo educativo. Os alumnos do colexio Sequelo de Marín non puideron acudir a clase este venres debido ao risco de desbordamento do río Lameira, que pasa por unha zona moi próxima ao centro e ao pavillón deportivo.
Fontes da delegación territorial da Xunta de Galicia en Pontevedra confirmaron que o equipo directivo do centro foi consciente do risco á primeira hora da mañá e avisou aos pais dos escolares para que non levasen aos nenos a clase. A medida obrigou a 260 alumnos do centro e tan só algún descoidado acudiu igualmente ao centro. Nese momento, foi enviado de regreso a casa pois non había actividade lectiva.
O río Lameira xa afectou de forma negativa á actividade deste colexio marinense con anterioridade.
Ademais, no pavillón contiguo foi necesario realizar obras de mellora e o Concello de Marín contratou a unha empresa especializada para acometer a limpeza do río Lameira, para evitar os efectos de arrastes de pedras e demais elementos que dificultasen a canle e dese lugar a inundacións ou desbordes.