O secretario do Pleno municipal emitiu un informe no que alega diferentes motivos para que non avancen as propostas realizadas por Marea Pontevedra e polo PSOE en relación coa recuperación do proceso de redacción, aprobación e posta en marcha dun novo Plan Xeral de Ordenación Municipal (PXOM), que se apoiou no pleno por todos os grupos da oposición ao goberno local.
Carme da Silva, a concelleira de Urbanismo, cualificou de "demoledor" este documento técnico no que rexeita a idea de establecer contacto coa empresa redactora do PXOM para aproveitar os traballos realizados debido a que non é necesario chegar a un acordo cunha empresa porque os traballos son xa de propiedade municipal. "É o Concello quen ten a súa propiedade" indicou a concelleira.
En relación coa subcomisión que se formulaba crear non é procedente legalmente, formalmente nin por contido porque non se considera en ningunha normativa a creación dunha subcomisión e ademais con competencias económicas. Desta forma, o secretario indica que dende o punto de vista xudicial non é executable.
"Non se poden ter ocorrencias deste tipo" indicou Carme da Silva que insistiu en que todos os técnicos do Concello están a disposición dos concelleiros de todas as forzas políticas para ter coñecemento que lles permita levar a cabo propostas pero "parece que non queren utilizar este tipo de recursos e despois levan cousas a pleno que non se poden despois efectivizar porque carecen de fundamento legal, formal, etc".