A área sanitaria de Pontevedra e O Salnés seguirá este martes 18 de maio co proceso de vacinación fronte á covid-19 ao colectivo de persoas entre 50 e 59 anos. En total, 4.300 menores de 60 recibirán unha dose da vacina de Pfizer en recintos para a vacinación masiva.
Segundo a previsión de vacinación do Servizo Galego de Saúde, 3.200 persoas vanse vacinar no recinto feiral de Pontevedra, 1.700 en horario de mañá e 1.500 pola tarde.
Outras 1.100 persoas van recibir a súa dose de Pfizer no recinto feiral Fexdega de Vilagarcía. Un total de 600 foron convocados pola mañá e 500 pola tarde.
O Sergas empezou a administrar a vacina de Pfizer a persoas menores de 60 anos o pasado martes 11 de maio. A este colectivo xa o empezaran a vacinar con AstraZeneca, pero a inoculación tivo que suspenderse ao pasar a recomendarse esa vacina só para maiores de 60 e agora retómase.
No primeiro día de vacinación a este colectivo, na área sanitaria de Pontevedra e O Salnés foron citadas un total de 3.900 persoas en centros de vacinación masiva.
Engade Pontevedra Viva como fonte preferida de Google de balde
Mantente informado coas últimas noticias de actualidade.