Este mércores, o alcalde de Soutomaior, Manu Lourenzo, e o concelleiro de Obras, Pablo Garrido, estiveron a visitar os traballos xunto ao director e ao xefe de obra da empresa COVSA, que é a encargada do proxecto.
Desde o goberno local confían en que esta reforma mellore moito a mobilidade pola zona, tanto para os veciños como para os peregrinos que pasan cada semana por Soutomaior.
Segundo comentou Manu Lourenzo, trátase dun "proxecto crave", non só por todo o que significa o Camiño de Santiago para o municipio a nivel económico, social e cultural, senón tamén porque vai supor un cambio importante no aspecto do centro de Arcade, facéndoo "máis agradable e sostible".
Tamén explicou que estas obras permitirán facer melloras importantes no subsolo, como evitar verteduras á ría e renovar o sistema de saneamento. É, en definitiva, unha actuación "completa e estratéxica" que marca "o comezo da transformación do centro de Arcade". Logo virán outras reformas como as da Praza de Talo Río, Rosalía de Castro e o Portal do Ribeiro, que arrincarán nos próximos meses.
A empresa COVSA levou a adxudicación da obra, que ten un orzamento de 750.000 euros. A metade vén das arcas municipais e a outra metade dunha axuda do Fondo de Cooperación Local da Xunta de Galicia.
Dese orzamento, uns 150.000 euros vanse a destinar a renovar a rede de sumidoiros e a protexer a ría.
A idea é que todo estea terminado antes de 2026. Mentres tanto, está a tentarse que os traballos afecten o menos posible tanto ao tráfico de coches como ao paso de peóns, para non causar moitas molestias e que a vida en Arcade siga con normalidade.