Traballo a contrarreloxo no CEIP Tenorio para que os alumnos poidan recuperar a normalidade despois das vacacións de entroido.
A Consellería de Educación contratou polo procedemento de urxencia á empresa Construciones Ramírez para levar a cabo o desentullo da zona incendiada no comedor e a súa posterior reconstrución, e que obrigou a suspender a actividade educativa.
Segundo explicou o Concello de Cerdedo-Cotobade tras unha visita este luns do alcalde, Jorge Cubela, os operarios están a descubrir todo o falso teito e procedendo á limpeza das paredes e das aulas. Ademais, o falso teito desde o acceso principal do colexio até as aulas de Infantil e os primeiros cursos de Primaria será reposto con novas plaquetas, asegurando condicións de seguridade e salubridade.
Tamén se iniciou a restauración da instalación eléctrica do edificio afectado polo incendio.
En canto á segunda planta, xa se atopa limpa incluíndo azulexos, paredes dos baños, portas, aulas, cadeiras, mesas e teitos.
Ademais para eliminar cheiros e completar a desinfección están a empregarse produtos de ozono.
"Estamos a traballar con absoluta coordinación coa Consellería de Educación para que todo estea listo o antes posible. O noso obxectivo é que o xoves o alumnado poida volver ás aulas con total normalidade e nas mellores condicións", explicou Jorge Cubela.
"A prioridade é garantir a seguridade da comunidade educativa e minimizar ao máximo o impacto desta incidencia", engadiu o alcalde.