Os once hostaleiros de Pontevedra, Marín e Poio que iniciaban este luns a súa marcha ata Madrid na denominada 'Operación Rescate Hostalería' chegaban durante as últimas horas da tarde á súa primeira parada, San Xurxo de Sacos.
Nesta primeira etapa mantiveron un encontro con Jorge Cubela, alcalde de Cerdedo-Cotobade e portavoz do grupo popular na Deputación de Pontevedra. O rexedor manifestou aos participantes desta marcha reivindicativa a súa solidariedade e o seu apoio.
Segundo explican estes peregrinos que tentan dar visibilidade á dureza do momento que atravesa o sector, durante o seu traxecto atoparon numerosos profesionais da hostalería que lles ofrecen ceas e aloxamento gratuíto para solidarizarse coa causa que defenden. Para pasar esta primeira noite fóra das súas vivendas, cedéronlles a casa rural Fontán.
Durante a xornada deste martes festivo esperan chegar ao municipio do Carballiño en Ourense, onde serán recibidos por hostaleiros desta localidade. A marcha realízase con sete hostaleiros a pé e catro que lles acompañan en coche como apoio, todos son socios da asociación Hoempo.
Teñen previsto chegar nun prazo de 15 días a Madrid onde se presentarán no Congreso dos Deputados. Buscan chamar a atención de toda España e que os gobernos autonómicos do Partido Popular e o goberno central liderado polo Partido Socialista atendan as súas reivindicacións e ofrezan solucións a un sector que se atopa afogado con motivo da crise e das medidas restritivas xeradas a partir da pandemia.