Aínda que a programación deseñada polo goberno municipal de Pontevedra para celebrar o Día do Orgullo LGBTIQA+ xa comezou a semana pasada, o que foi bautizado como 'Orgullo PTV+', comezou oficialmente este luns.
Fíxoo coa estrea da intervención artística no balcón da casa consistorial, que durante toda a semana lucirá unha pancarta coas cores da bandeira arco iris.
Foi tras un izado presidido polo alcalde de Pontevedra, Miguel Anxo Fernández Lores, no que participaron edís do tres partidos -PP, BNG e PSdeG-PSOE- e representantes dalgúns dos colectivos que colaboran con esta esta programación.
Pontevedra presume de ser "orgullosamente diversa" e, desde o pasado martes, fala a diario de cuestións relacionadas coa diversidade, reafirmando á Boa Vila como un espazo "seguro, amable e respectuoso" para toda a cidadanía.
Tamén este luns 23 de xuño comezou unha nova edición de Ambienta, a Mostra Internacional de cinema LGBTIQA+ de Pontevedra, que arrancou coa proxección da webserie galega Delirio Sketchs.
Continuará este martes coa película Ocaña retrat intermitent, dirixida por Ventura Pons en 1978, coincidindo coa charla sobre a pegada lésbica nos deportes de contacto, ás 19:00 horas, na Casa das Campás, con Lavandeiras de San Simón e Eli Martínez Rosales.
O sábado 28 de xuño será o día grande da festa no Parque das Palmeiras, deseñado como un "espazo inclusivo onde todo o mundo é benvido" e cuxo programa foi revelado hai uns días.
O punto e final da xornada será a manifestación que partirá ás 20:00 horas do Parque das Palmeiras baixo a lema "Nin un paso atrás, nin unha letra menos".
Esta marcha busca protestar contra as violencias que sofre o colectivo en "tempos tan polarizados e extremos", reafirmando a necesidade de ser visible e defender que "todas as letras do colectivo son igual de importantes".
