Se quedaba algunha dúbida de que Alfonso Rueda ía ser o home de consenso sobre o que pivotará o futuro do PPdeG e da Xunta de Galicia tras o salto de Alberto Núñez Feijóo á política nacional, quedaron disipadas tras o paso á fronte dos 'baróns' provinciais.
O primeiro en bendicir ao político pontevedrés foi o ourensán José Manuel Baltar, que nada máis reunirse con Núñez Feijóo o pasado martes sinalou directamente a Rueda como "o mellor sucesor e o mellor deputado" para tomar as rendas do goberno galego e do partido.
A el sumouse nas últimas horas o presidente do PP da Coruña, Diego Calvo, ao que moitos apuntaban como posible candidato a este mesmo relevo.
"Creo que Alfonso Rueda é a persoa idónea para asumir a presidencia da Xunta e do partido", sinalou Calvo, que celebra que este proceso se aborde no marco dun congreso extraordinario, demostrando que o PP "é un partido maduro e democrático".
Entende que a través dun congreso aberto darase liberdade aos afiliados para expresar a súa opinión. "E é precisamente desde esa liberdade desde a que dou o meu apoio a unha posible lista de consenso e unidade encabezada por Alfonso Rueda", engadiu.
A lucense Elena Candia tamén mostrou o seu apoio a Rueda, do que afirmou que "creo na súa experiencia de xestión e na súa experiencia orgánica".
"Se decide dar o paso, eu estarei ao seu lado e tamén o votarei na sesión de investidura cando chegue o momento", asegurou a presidenta dos populares de Lugo.
CONGRESO EN PONTEVEDRA?
Para a sucesión á fronte do partido, o PPdeG citou á súa xunta directiva para o vindeiro luns 18 de abril en Santiago para abordar a convocatoria dun congreso extraordinario en Galicia para renovar ao equipo que conducirá o partido a partir de agora.
Este congreso, que previsiblemente se celebrará a última fin de semana de maio, podería ser en Pontevedra se os populares manteñen o compromiso de Núñez Feijóo.
Tras suspenderse o último conclave previsto na cidade do Lérez pola pandemia, o aínda presidente do PP galego asegurou que a seguinte gran cita do partido sería en Pontevedra, cidade da que ademais é natural o propio Alfonso Rueda.