O centro de especialidades da Casa do Mar de Mollabao acaba de converterse no primeiro centro de saúde pontevedrés que adapta a súa sinalización á linguaxe pictográfica dentro dun proxecto para adaptar as instalacións sanitarias e mellorar a accesibilidade á información dos pacientes con espectro autista (TEA) ou con trastornos da comunicación e a súa adecuación á contorna sanitaria.
O xerente de Xestión Integrada de Pontevedra e O Salnés, José Manuel González Álvarez, e a supervisora de Mollabao, Carmen Alfonsín Comedeiro, percorreron as instalacións do centro para revisar o proxecto levado a cabo en colaboración co colectivo Por Dereito (Asociación para a Integración das Persoas con Autismo). González Álvarez anunciou que o seguinte centro en contar con estes apoios visuais será o da Parda.
Esta iniciativa, que deu comezo no Hospital Provincial, o primeiro centro hospitalario que acolleu un proxecto destas características en Galicia, e continuou no Hospital do Salnés, pretende a sinalización de espazos mediante un sistema de comunicación alternativo e aumentativo baseado en pictogramas. A través desta metodoloxía, búscase facilitar a integración daquelas persoas con TEA e de todos aqueles que precisen de apoios visuais por ter dificultades para a comunicación ou que non teñen acceso á linguaxe escrita.
En total, colocáronse 160 pictogramas na Casa do Mar de Mollabao, que foron supervisados pola presidenta de Por Dereito, María Cruz da Silva, e distribuídos polas consultas de saúde mental, oftalmoloxía, xinecoloxía, uroloxía, dermatoloxía, cardioloxía, dixestivo, cirurxía, otorrinolaringoloxía e traumatoloxía, ademais das zonas de uso xeral, puntos de información, ascensores, aseos, salas de espera, vestíbulos e salón de actos, entre outros.
Os pacientes con TEA, fundamentalmente pediátricos, poden experimentar episodios de ansiedade ou responder con problemas de comportamento ante situacións novas e descoñecidas. Neste senso, a linguaxe pictográfica facilita a comprensión da súa contorna, polo que mediante a colocación dos pictogramas nos espazos sanitarios, os pacientes poderán visualizar o que existe detrás de cada porta. Ademais de lograr a normalización e a súa inclusión no ámbito sanitario, este sistema contribúe a reducir a súa ansiedade e a fomentar a súa autonomía, dentro das posibilidades de cada persoa.