Representantes dos equipos de valoración e orientación da consellería de Política Social concentrábanse este xoves #ante o Parlamento de Galicia. Estes equipos son os encargados de facilitar a axuda necesaria ás persoas con discapacidade para que poidan mellorar a súa calidade de vida.
En Pontevedra, este colectivo concéntrase todas as semanas ante a antiga sede de Sanidade, situada na avenida de Vigo. Este xoves, en Santiago, contaron co apoio de parlamentarios dos grupos da oposición: PSOE, En Marea, Grupo Mixto e BNG.
Piden que se remate coa contratación temporal, a creación de novos equipos e que a consellería evite citar a pacientes o día da xunta de valoración. Reclaman tamén o acceso ao sistema informático (IANUS) para o persoal de psicoloxía, que se respecten os tempos horarios nas valoracións e que se presente unha solicitude máis clara e adaptada ás necesidades dos usuarios.
Solicitan, ademais, a creación con carácter permanente de novos equipos de valoración naquelas localidades en que a carga de traballo provoca a superación dos prazos legalmente establecidos, así como a dotación de máis persoal de corpos xerais.
Este venres, ás 12.00 horas, o persoal volverá concentrarse na avenida de Vigo para incidir na necesidade de que se estableza unha contratación de profesionais de forma continuada e non temporal.